ਨਵੀਂ ਦਿੱਲੀ, 13 ਮਈ – ਲੋਕ ਸਭਾ ਚੋਣ ਦੇ ਛੇਵੇਂ ਗੇੜ ਦੌਰਾਨ 12 ਮਈ ਦਿਨ ਐਤਵਾਰ ਨੂੰ ਰਾਸ਼ਟਰੀ ਰਾਜਧਾਨੀ ਦਿੱਲੀ ਅਤੇ 6 ਰਾਜਾਂ ਦੀ 59 ਲੋਕ ਸਭਾ ਸੀਟਾਂ ਲਈ 63.48 ਫੀਸਦ ਮਤਦਾਨ ਹੋਇਆ। ਪੱਛਮ ਬੰਗਾਲ ਵਿੱਚ ਸਭ ਤੋਂ ਜ਼ਿਆਦਾ ਮਤਦਾਨ ਹੋਇਆ। ਕੁੱਝ ਹਿੰਸਕ ਘਟਨਾਵਾਂ ਤੋਂ ਇਲਾਵਾ ਆਮ ਤੌਰ ‘ਤੇ ਮਤਦਾਨ ਸ਼ਾਂਤੀਪੂਰਨ ਰਿਹਾ।
ਛੇਵੇਂ ਪੜਾਅ ਦੇ ਮਤਦਾਨ ਦੇ ਨਾਲ ਹੀ ਲੋਕ ਸਭਾ ਦੀਆਂ 543 ਸੀਟਾਂ ਵਿੱਚੋਂ 483 ਸੀਟਾਂ ਲਈ ਮਤਦਾਨ ਖ਼ਤਮ ਹੋ ਗਿਆ ਹੈ। ਆਖ਼ਰੀ ਪੜਾਅ ਵਿੱਚ 19 ਮਈ ਨੂੰ 59 ਸੀਟਾਂ ਉੱਤੇ ਮਤਦਾਨ ਹੋਵੇਗਾ, ਤਾਮਿਲਨਾਡੂ ਵਿੱਚ ਇੱਕ ਸੀਟ ਉੱਤੇ ਚੋਣ ਮੁਲਤਵੀ ਕਰ ਦਿੱਤਾ ਗਿਆ ਹੈ। 23 ਮਈ ਨੂੰ ਵੋਟਾਂ ਦੀ ਗਿਣਤੀ ਹੋਵੇਗੀ।
ਚੋਣ ਕਮਿਸ਼ਨ ਦੇ ਮੁਤਾਬਿਕ ਇਸ ਗੇੜ ਵਿੱਚ ਪੱਛਮ ਬੰਗਾਲ ਵਿੱਚ 8 ਸੀਟਾਂ ਲਈ ਹੋਏ ਵੋਟਿੰਗ ‘ਚ ਸਭ ਤੋਂ ਜ਼ਿਆਦਾ 80.34 ਫੀਸਦ ਮਤਦਾਨ ਦਰਜ ਕੀਤਾ ਗਿਆ ਹੈ। ਜਦੋਂ ਕਿ ਉੱਤਰ ਪ੍ਰਦੇਸ਼ ਵਿੱਚ 14 ਸੀਟਾਂ ਲਈ ਹੋਈ ਵੋਟਿੰਗ ‘ਚ ਸਭ ਤੋਂ ਘੱਟ 54.12 ਫੀਸਦ ਮਤਦਾਨ ਦਰਜ ਕੀਤਾ। ਇਨ੍ਹਾਂ ਤੋਂ ਇਲਾਵਾ ਦਿੱਲੀ ਦੀਆਂ 7 ਸੀਟਾਂ ਉੱਤੇ 60.37 ਫੀਸਦ, ਬਿਹਾਰ ਦੀਆਂ 8 ਸੀਟਾਂ ਉੱਤੇ 59.38 ਫੀਸਦ, ਹਰਿਆਣਾ ਦੀਆ 10 ਸੀਟਾਂ ਉੱਤੇ 67.40 ਫੀਸਦ, ਮੱਧ ਪ੍ਰਦੇਸ ਦੀਆਂ 8 ਸੀਟਾਂ ਉੱਤੇ 61.12 ਫੀਸਦ ਅਤੇ ਝਾਰਖੰਡ ਦੀਆਂ 4 ਸੀਟਾਂ ਉੱਤੇ 64.46 ਫੀਸਦ ਮਤਦਾਨ ਦਰਜ ਕੀਤਾ ਗਿਆ।
ਛੇਵੇਂ ਗੇੜ ਵਿੱਚ ਕੇਂਦਰੀ ਮੰਤਰੀ ਹਰਸ਼ਵਰਧਨ, ਮੇਨਕਾ ਗਾਂਧੀ, ਰਾਧਾਮੋਹਨ ਸਿੰਘ, ਨਰੇਂਦਰ ਸਿੰਘ ਤੋਮਰ, ਕਾਂਗਰਸ ਨੇਤਾ ਦਿਗਵਿਜੈ ਸਿੰਘ, ਪ੍ਰਗਿਆ ਠਾਕੁਰ, ਜੋਤੀਰਾਦਿਤਿਅ ਸਿੰਧੀਆ, ਸਪਾ ਪ੍ਰਧਾਨ ਅਖਿਲੇਸ਼ ਯਾਦਵ ਦੀ ਕਿਸਮਤ ਵੀ ਈਵੀਐਮ ਵਿੱਚ ਕੈਦ ਹੋ ਗਈ ਹੈ।
ਇਸ ਗੇੜ ਵਿੱਚ ਕਈ ਨਾਮਚੀਨ ਹਸਤੀਆਂ ਨੇ ਵੀ ਮਤਦਾਨ ਕੀਤਾ। ਰਾਸ਼ਟਰੀ ਰਾਜਧਾਨੀ ਦਿੱਲੀ ਵਿੱਚ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ, ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ, ਸੋਨੀਆ ਗਾਂਧੀ ਸਮੇਤ ਕਈ ਹੋਰ ਮੰਨੇ-ਪ੍ਰਮੰਨੇ ਲੋਕਾਂ ਨੇ ਵੋਟ ਪਾਏ। ਕੁੱਝ ਥਾਵਾਂ ਉੱਤੇ ਈਵੀਐਮ ਵਿੱਚ ਖ਼ਰਾਬੀ ਦੀਆਂ ਸ਼ਿਕਾਇਤਾਂ ਵੀ ਆਈਆਂ। ਹਾਲਾਂਕਿ ਕੁੱਝ ਸਥਾਨਾਂ ਉੱਤੇ ਈਵੀਐਮ (ਇਲੈਕਟਰਾਨਿਕ ਵੋਟਿੰਗ ਮਸ਼ੀਨ) ਅਤੇ ਵੀਵੀਪੈਟ (ਵੋਟਰ ਵੇਰੀਫਾਏਬਲ ਪੇਪਰ ਆਡਿਟ ਟਰੇਲ) ਮਸ਼ੀਨਾਂ ਵਿੱਚ ਖ਼ਰਾਬੀ ਦੇ ਚਲਦੇ ਸਵੇਰੇ ਮਤਦਾਨ ਸ਼ੁਰੂ ਹੋਣ ਵਿੱਚ ਮੁਸ਼ਕਿਲ ਆਈ। ਮਾਕ ਪੋਲ ਦੇ ਬਾਅਦ 5.5 ਫੀਸਦ ਈਵੀਐਮ ਬਦਲੇ ਗਏ। ਦਿੱਲੀ ਦੇ ਸਭ ਤੋਂ ਵੱਡੇ ਮਤਦਾਤਾ 111 ਸਾਲਾ ਬਚਨ ਸਿੰਘ ਨੇ ਪੱਛਮ ਦਿੱਲੀ ਦੇ ਤਿਲਕ ਨਗਰ ਵਿੱਚ ਵੋਟ ਪਾਇਆ।
