ਮਾਸਕੋ, 6 ਮਈ – ਰੂਸ ਦੀ ਰਾਜਧਾਨੀ ਮਾਸਕੋ ਵਿੱਚ 5 ਮਈ ਦਿਨ ਐਤਵਾਰ ਨੂੰ ਐਮਰਜੈਂਸੀ ਲੈਂਡਿੰਗ ਦੇ ਦੌਰਾਨ ਸੁਖੋਈ ਸੁਪਰਜੈੱਟ 100 ਯਾਤਰੀ ਜਹਾਜ਼ ਵਿੱਚ ਅੱਗ ਲੱਗ ਗਈ, ਜਿਸ ਵਿੱਚ 41 ਲੋਕਾਂ ਦੀ ਮੌਤ ਹੋ ਗਈ। ਮਰਨੇ ਵਾਲੀਆਂ ਵਿੱਚ 2 ਬੱਚੇ ਵੀ ਸ਼ਾਮਿਲ ਹਨ। ਘਟਨਾ ਮਾਸਕੋ ਏਅਰਪੋਰਟ ਉੱਤੇ ਹੋਈ ਹੈ। ਕਈ ਯਾਤਰੀ ਜਹਾਜ਼ ਦੀ ਐਮਰਜੈਂਸੀ ਸਲਾਈਡਸ ਦੇ ਮਾਧਿਅਮ ਰਾਹੀ ਬਾਹਰ ਨਿਕਲੇ, ਜੋ ਹਾਰਡ ਲੈਂਡਿੰਗ ਦੇ ਬਾਅਦ ਫੁਲਾਇਆ ਗਿਆ ਸੀ।
ਹਾਦਸੇ ਦਾ ਸ਼ਿਕਾਰ ਹੋਏ ਜਹਾਜ਼ ਨੇ ਮਾਸਕੋ ਏਅਰਪੋਰਟ ਤੋਂ ਉੱਤਰੀ ਰੂਸ ਦੇ ਮਰਮਾਂਸਕ ਸ਼ਹਿਰ ਲਈ ਉਡਾਣ ਭਰੀ ਸੀ। ਇਸ ਵਿੱਚ 73 ਯਾਤਰੀ ਅਤੇ 5 ਕਰੂ ਮੈਂਬਰ ਸਵਾਰ ਸਨ। ਦੁਰਘਟਨਾ ਦੀ ਜਾਂਚ ਕਰ ਰਹੀ ਟੀਮ ਦੇ ਬੁਲਾਰੇ ਸਵੇਤਲਾਨਾ ਪੇਟਰੇਂਕੋ ਨੇ ਕਿਹਾ ਕਿ ਜਹਾਜ਼ ਵਿੱਚ ਮੌਜੂਦ 78 ਲੋਕਾਂ ਵਿੱਚੋਂ ਸਿਰਫ਼ 37 ਲੋਕ ਜਿੰਦਾ ਹਨ, ਯਾਨੀ ੪੧ ਲੋਕਾਂ ਦੀ ਮੌਤ ਹੋ ਗਈ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਉਡਾਣ ਭਰਦੇ ਹੀ ਜਹਾਜ਼ ਵਿੱਚ ਧੂੰਆਂ ਉੱਠਣ ਲਗਾ। ਇਸ ਉੱਤੇ ਜਹਾਜ਼ ਦੇ ਚਾਲਕ ਦਲ ਨੇ ਏਟੀਸੀ ਨੂੰ ਸੂਚਨਾ ਦਿੱਤੀ ਅਤੇ ਜਹਾਜ਼ ਦੀ ਐਮਰਜੈਂਸੀ ਲੈਂਡਿੰਗ ਕਰਾਈ ਗਈ। ਲੈਂਡਿੰਗ ਦੇ ਦੌਰਾਨ ਪੂਰਾ ਜਹਾਜ਼ ਅੱਗ ਦੇ ਗੋਲੇ ਵਿੱਚ ਬਦਲ ਗਿਆ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਜਹਾਜ਼ ਤੋਂ ਨਿਕਲਦੀ ਅੱਗ ਦੀਆਂ ਲਪਟਾਂ ਅਤੇ ਅਸਮਾਨ ਵਿੱਚ ਧੂੰਆਂ ਦੂਰੋਂ ਵੇਖਿਆ ਜਾ ਸਕਦਾ ਸੀ। ਹਵਾਈ ਅੱਡੇ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਜਹਾਜ਼ ਦੋ ਸਾਲ ਪੁਰਾਣਾ ਸੀ। ਹਾਦਸੇ ਦੇ ਕਾਰਣਾਂ ਦਾ ਪਤਾ ਲਗਾਉਣ ਲਈ ਜਾਂਚ ਕਰਾਈ ਜਾਵੇਗੀ।
