ਆਕਲੈਂਡ, 8 ਫਰਵਰੀ – ਸਰਕਾਰ ਨੇ ਅੱਜ ਦੁਪਹਿਰ ਐਲਾਨ ਕੀਤਾ ਹੈ ਕਿ ਇਸ 1 ਅਪ੍ਰੈਲ ਤੋਂ ਘੰਟਾਵਾਰ ਘੱਟੋ-ਘੱਟ ਉਜਰਤ (Minimum Wage) 7% ਦੇ ਵਾਧੇ ਨਾਲ $22.70 ਹੋ ਜਾਵੇਗੀ। ਇਹ $1.50 ਦਾ ਵਾਧਾ ਹੈ। ਇਸ ਵੇਲੇ ਮੌਜੂਦਾ ਘੱਟੋ-ਘੱਟ ਉਜਰਤ $21.20 ਹੈ। ਇਹ $21.20 ਦੀ ਮੌਜੂਦਾ ਘੰਟਾਵਾਰ ਦਰ ਤੋਂ $1.50 ਪ੍ਰਤੀ ਘੰਟਾ ਦਾ ਵਾਧਾ ਹੈ ਅਤੇ ਦਸੰਬਰ 2022 ਨੂੰ ਖ਼ਤਮ ਹੋਏ ਸਾਲ ‘ਚ ਖਪਤਕਾਰ ਮੁੱਲ ਸੂਚਕਾਂਕ ਮਹਿੰਗਾਈ ਦੀ 7.2% ਦਰ ਨਾਲ ਮੇਲ ਖਾਂਦਾ ਹੈ। ਇਹ ਵਾਧਾ ਮਹਿੰਗਾਈ ਦੇ ਅਨੁਰੂਪ ਹੈ ਅਤੇ ਇਸ ਦਾ ਮਤਲਬ ਹੈ ਕਿ ਘੱਟੋ-ਘੱਟ ਉਜਰਤ ‘ਤੇ ਪੂਰਾ ਸਮਾਂ ਕੰਮ ਕਰਨ ਵਾਲਾ ਵਿਅਕਤੀ ਜੋ ਇਸ ਵੇਲੇ ਹਫ਼ਤੇ ਵਿੱਚ $715 ਕਮਾ ਰਿਹਾ ਹੈ, ਹੁਣ ਉਹ 1 ਅਪ੍ਰੈਲ ਤੋਂ ਆਪਣੇ ਨਾਲ $756 ਲਿਆਏਗਾ।
ਪ੍ਰਧਾਨ ਮੰਤਰੀ ਕ੍ਰਿਸ ਹਿਪਕਿਨਜ਼ ਨੇ ਅੱਜ ਕੈਬਨਿਟ ਤੋਂ ਬਾਅਦ ਦੀ ਪ੍ਰੈੱਸ ਕਾਨਫ਼ਰੰਸ ਵਿੱਚ ਇਹ ਐਲਾਨ ਕੀਤਾ। ਪ੍ਰਧਾਨ ਮੰਤਰੀ ਹਿਪਕਿਨਜ਼ ਨੇ ਕਿਹਾ ਕਿ ਜਦੋਂ ਉਹ ਲੇਬਰ ਲੀਡਰ ਬਣੇ ਤਾਂ ਉਨ੍ਹਾਂ ਨੇ ਵਾਅਦਾ ਕੀਤਾ ਕਿ ਸਰਕਾਰ ‘ਜੀਵਨ ਦੇ ਖ਼ਰਚੇ ਵਿੱਚ ਪਰਿਵਾਰਾਂ ਦੀ ਮਦਦ ਕਰਨ ਲਈ ਹੋਰ ਵੀ ਕੁੱਝ ਕਰਨਗੇ’। ਉਨ੍ਹਾਂ ਕਿਹਾ, ‘ਇਸ ਨੂੰ ਧਿਆਨ ‘ਚ ਰੱਖਦੇ ਹੋਏ, ਕੈਬਨਿਟ ਨੇ ਅੱਜ ਸੀ.ਪੀ.ਆਈ. ਦੇ ਅਨੁਸਾਰ ਨਵੀਂ ਘੱਟੋ-ਘੱਟ ਉਜਰਤ ਵੀ ਤੈਅ ਕੀਤੀ ਹੈ’।
ਮੰਤਰੀ ਮੰਡਲ ਨੇ ਘੱਟੋ-ਘੱਟ ਉਜਰਤ ਨੂੰ $1.50 ਵਧਾ ਕੇ $22.70 ਪ੍ਰਤੀ ਘੰਟਾ ਕਰਨ ਲਈ ਸਹਿਮਤੀ ਦਿੱਤੀ ਹੈ, ਇਹ 1 ਅਪ੍ਰੈਲ, 2023 ਤੋਂ ਲਾਗੂ ਹੋਵੇਗੀ। ਸਿਖਲਾਈ ਅਤੇ ਸ਼ੁਰੂਆਤੀ ਦੀ ਘੱਟੋ-ਘੱਟ ਉਜਰਤ ਦਰਾਂ ਨੂੰ ਬਾਲਗ ਘੱਟੋ-ਘੱਟ ਉਜਰਤ ਦੇ 80% ‘ਤੇ ਬਣਾਈ ਰੱਖਿਆ ਜਾਏਗਾ। ਸਿਖਲਾਈ ਅਤੇ ਸ਼ੁਰੂਆਤੀ ਘੱਟੋ-ਘੱਟ ਮਿਹਨਤਾਨਾ ਦਰ ਦੋਵੇਂ ਵੱਧ ਕੇ $18.16 ਪ੍ਰਤੀ ਘੰਟਾ ਹੋ ਜਾਣਗੀਆਂ। ਇਹ $16.96 ਪ੍ਰਤੀ ਘੰਟਾ ਦੀ ਮੌਜੂਦਾ ਘੱਟੋ-ਘੱਟ ਦਰ ਤੋਂ ਵੱਧ ਹੈ।
ਇੱਕ ਕਰਮਚਾਰੀ ਜੋ ਹਫ਼ਤੇ ‘ਚ 40 ਘੰਟੇ ਕੰਮ ਕਰਦਾ ਹੈ, ਉਸ ਦੇ ਘੱਟੋ-ਘੱਟ ਉਜਰਤ $22.70 ਪ੍ਰਤੀ ਘੰਟਾ ਵਧਣ ਦਾ ਮਤਲਬ ਹੈ ਕਿ ਉਹ ਟੈਕਸ ਤੋਂ ਪਹਿਲਾਂ ਹਰ ਹਫ਼ਤੇ $60 ਵਾਧੂ ਕਮਾਉਣਗੇ।
ਨਿਊਜ਼ੀਲੈਂਡ ਦੇ ਲਗਭਗ 222,900 ਕਰਮਚਾਰੀਆਂ ਨੂੰ ਮੌਜੂਦਾ ਅਤੇ ਨਵੀਂ ਘੱਟੋ-ਘੱਟ ਉਜਰਤ ਦਰਾਂ ਦੇ ਵਿਚਕਾਰ ਭੁਗਤਾਨ ਕੀਤਾ ਗਿਆ ਹੈ, ਘੱਟੋ-ਘੱਟ ਉਜਰਤ ਵਿੱਚ ਤਬਦੀਲੀ ਦੇ ਨਤੀਜੇ ਵਜੋਂ ਉਨ੍ਹਾਂ ਦੇ ਤਨਖ਼ਾਹ ਦੇ ਪੈਕਟਾਂ ‘ਚ ਵਾਧਾ ਵੇਖਣ ਨੂੰ ਮਿਲੇਗਾ।
ਸਰਕਾਰ ਇਸ ਸਾਲ ਦੇ ਅੰਤ ‘ਚ ਘੱਟੋ-ਘੱਟ ਉਜਰਤ ਦਰ ਦੀ ਦੁਬਾਰਾ ਸਮੀਖਿਆ ਕਰੇਗੀ।
